الحب واللى بيحبوا

لو اتمشينا على الكورنيش او زورنا مول سيتى ستارز اللى فى مدينه نصر أو شفنا جامعتنا الموقره …… هنشوف ايه ؟….هنلاقى الاحبه اتنين اتنين …. هنشوف كل شاب من الشباب الفانكى ساحب ( الموزة..او الجثه..او الحته..او المله ..زى ما بيقولوا الشباب) بتاعته يعنى البنت اللى عامل انه بيحبها….مفهوم طبعا … ده مش موضوعنا الموضوع هو …هل يا ترى يا هل ترى ؟ الاتنين دول بيحبوا بعض …ولا اشتغالات ؟…. مش عارف ليه مش مستريح لكلمه حب على العلاقه دى …. يا جماعه كلمه(بحبك) مش سهله للدرجه دى

عموما انا حبيت اعرف من الشباب يا ترى هما ناويين على خطوبه ؟ … ولا فلسعه بعد يومين ؟….
وأحد مراسلينا فى القاهرة نزل الشارع وأول ناس سألهم هم البنات

وطبعا البنات كانوا بيشجعوه على استطلاع الرأى فى الموضوع ده ….أكيد كل واحده عايزه تعرف راسها من رجليها…. طب يسأل مين ..؟ مين ..؟ مين ..؟ صديقنا حمزاوى الروش قاعد على كافيه محترم..فى الهرم.. وكان لنا معه هذا الحوار …..

المحرر : صباح الفل يا حمزاوى

حمزاوى : صباح الورد يا مان

المحرر: ممكن اسألك سؤال لولبى ؟ … علل ؟… يعنى افطن ؟

حمزاوى : اتفضل يا سيدى بس بلاش والنبى موضوع رغيف العيش ده عشان انا تخنقت ....... هوا مفيش غيرى تسألوه !!!

المحرر : اوك …. ايه رأيك فى حب اليومين دول ؟

حمزاوى : مش فاهم نظريه سعادتك ؟ .. ايه المطلوب منى دلوقتى ؟ ….أأمرنى ؟

المحرر: الامر لله وحده … صحصح معايا يا حمزاوى…انا بسألك عن رأيك فى العلاقه بين الشباب والبنات.. اليومين دول ..واللى بيقولوا عليها حب..؟

حمزاوى : اه .. مش تقول كده من الصبح …قصدك ان الواد بيعلق البت وبيسرح بيها ….مش كده ؟!

المحرر : تقريبا كده….ايه رأيك في الموضوع ده بقى ؟

حمزاوى : والله …انا رأيى ان الشباب والبنات عايزين يقضوها .. ويعيشوا …. وطالما مفيش ضرر …يبقى فكك بقى وسبنى اشرب الكابتشينو بتاعى

المحرر : كابتشينو ..؟ الله يرحم يا حمزاوى

____________

عموما هننتقل من حمزاوى لشاب اخر على نفس الكافيه .. وتقريبا كان سامع الحوار

المحرر : سلام عليكو يا مان … ممكن نتعرف بيك ؟
الشاب :انا محمد احمد … من الهرم

المحرر : اهلا بيك يا محمد

محمد : ايه الحوار بقى يا مان ؟

المحرر : انت اكيد سمعت كام كلمه من هنا وهنا واحنا بنتكلم

محمد : بصراحه انا ودنى كانت معاكم … وبص بقى انا هديك زتـــونة الموضوع

المحرر : ايه زتونة الموضوع دى ؟
قصدك الخلاصه يعنى ؟

محمد : الله ينور عليك….. بص بقى هو صحيح فيه اشتغالات اليومين دول … بس الشباب هتعمل ايه ؟…. ولا عارفين نشتغل ولا عارفين نتجوز ولا عارفين ناكل …. وكمان مش هنعرف نحب ؟…. لا كده تبقى ظاطت خالص يا معلم…. والشباب بقى عندها فراغ عاطفى …. يبقى عيش يا باشا … وسبنى اعيش

المحرر : يظهر ان محمد حط ايده على ( بلف ) الموضوع …بس برده انا ضدك فى موضوع عيش ده …..صحيح ان الاستاذ ريكو ..صاحب مقوله ( خلى الشعب يعيش ) عايز الناس تعيش وتنبسط … بس مش بالاسلوب ده يا محمد


________________

عموما عندنا وجهة نظر تانيه خالص

كان لنا هذا الحوار مع نيازى ميزو.. كليه حقوق .. جامعة القاهرة

المحرر : نيازى.. ايه رأيك فى الحب زمان ودلوقتى ؟

نيازى: الحب زي ماهو متغيرش لكن الي بيتغير الناس و الاشخاص هم الي ممكن يخلو الحب ده صادق و ممكن يخلوه اشتغاله و لكن معظم الشباب دلوقتي بقا عندهم الحب عباره عن اشتغاله بس… وده رأيى

المحرر : بشكرك يا نيازى على كلامك الجميل ده … وانا شامم ريحه كده فى ردك ده ….عموما ما علينا


________________

شباب
باب المناقشه لسه متقفلش …. ولسه معرفناش ايه اللى وصل شبابنا لمرحله التدنى الاخلاقى دى ….مستنى آرائكم وتعليقاتكم

ومسك الختام .. اجمل سلام .. بتحيه الاسلام ..

السلام عليكم